जेरुसेलम । ईरान र इजरायलबीच १२ दिनसम्म चलेको भीषण सैन्य द्वन्द्वपछिको युद्धविराम आज दोस्रो दिनमा प्रवेश गर्दा क्षेत्रीय अवस्था क्रमशः शान्त हुँदै गएको छ। अमेरिकी राष्ट्रपति डोनाल्ड ट्रम्पले युद्धविरामलाई ‘सफल रूपमा अघि बढिरहेको’ बताउँदै अमेरिकी आक्रमणहरूले ईरानको आणविक क्षमतामा गहिरो क्षति पुर्याएको दाबी गरेका छन्। उनका अनुसार यो आक्रमणले ईरानलाई ‘दशकौं पछाडि धकेलेको’ छ।
तर अमेरिकी गुप्तचर निकायहरूले भने ईरानका सबै आणविक केन्द्रहरू पूर्णरूपमा नष्ट नभएको र केवल केही महिना मात्र कार्यक्रम प्रभावित भएको उल्लेख गरेका छन्। रिपोर्टअनुसार भूमिगत आणविक स्थापनाहरू अझै सुरक्षित रहेका छन्।
यता, इजरायली सेनाले ईरानको आणविक पूर्वाधारमा ‘महत्त्वपूर्ण क्षति’ पु¥याएको भन्दै अभियानले कम्तीमा केही वर्षसम्म कार्यक्रमलाई ढिलाइ गराउने विश्वास व्यक्त गरेको छ। प्रधानमन्त्री बेन्जामिन नेतन्याहूले यसलाई ‘ऐतिहासिक विजय’ करार दिएका छन्।
ईरानी राष्ट्रपति मसउद पेसेश्कियानले भने देशको शान्तिपूर्ण परमाणु ऊर्जामा पहुँच कायम रहने स्पष्ट पारेका छन्। युद्धकालमा बन्द गरिएको इन्टरनेट सेवा पनि पुनः सञ्चालनमा ल्याउने प्रक्रिया सुरु गरिएको ईरानी क्रान्तिकारी गार्ड्सको साइबर शाखाले जनाएको छ।
युद्धमा ज्यान गुमाएका वरिष्ठ सैन्य अधिकृत र वैज्ञानिकहरूको सम्मानमा शनिबार राजकीय अन्त्येष्टि गरिने तयारी भइरहेको छ। इजरायली आक्रमणमा पहिलो दिनै मारिएका क्रान्तिकारी गार्ड्सका प्रमुख होसेइन सलामीलाई बिहीबार अन्त्येष्टि गरिनेछ।
ईरानी स्वास्थ्य मन्त्रालयका अनुसार हालसम्म ६१० सर्वसाधारणले ज्यान गुमाएका छन् भने इजरायली पक्षका अनुसार ईरानी आक्रमणबाट २८ जनाको मृत्यु भएको छ। इजरायलले ईरानको केन्द्रीय बैंकलाई ‘आतंकको आर्थिक स्रोत’ घोषणा गर्दै कडा निन्दा गरेको छ।
यसैबीच, ईरानी संसदले अन्तर्राष्ट्रिय आणविक ऊर्जा नियामक संस्था (IAEA) सँगको सहकार्य स्थगित गर्ने निर्णय गरेको छ। उक्त निर्णय लागू हुन संरक्षक परिषद्को अनुमोदन आवश्यक हुनेछ।
