जनकपुर । मधेश प्रदेशका मुख्यमन्त्री सतिशकुमार सिंहले विद्यालय तहको शिक्षा प्रणाली दिनदिनै नाजुक बन्दै गएको भन्दै स्थानीय तहलाई सुधारको नेतृत्व लिन आह्वान गरेका छन्।
मंगलबार महोत्तरीको औरही नगरपालिकाको १६ औं नगरसभालाई सम्बोधन गर्दै उनले सामुदायिक विद्यालयमा विद्यार्थी घट्दो संख्या, शिक्षक र अभिभावकको लापरबाही तथा लागूऔषध दुव्र्यसन जस्ता समस्याले शिक्षा क्षेत्रमा गम्भीर संकट देखिएको बताए।
“मधेशका जनशक्ति विगतमा शिक्षा, स्वास्थ्य र प्रविधिका क्षेत्रमा देशभर नेतृत्व गर्थे,” मुख्यमन्त्री सिंहले भने, “तर आज मधेशमै शिक्षा अवस्था नाजुक बनेको छ। अब स्थानीय तहले जिम्मेवारी लिनैपर्छ।”
सिंहले सरकारी विद्यालयमा भर्ना भएपछि शिक्षक र अभिभावक दुवैले आफ्ना जिम्मेवारी पूरा भयो भन्ने गलत बुझाइ राख्ने प्रवृत्तिले संकट थपिएको उल्लेख गरे। उनले ‘एक अर्कालाई दोष दिने र जिम्मेवारीबाट पन्छिने प्रवृत्ति’का कारण सामुदायिक विद्यालयमा अध्ययनको गुणस्तर खस्किएको बताए।
मुख्यमन्त्री सिंहले विद्यालय तहका बालबालिका लागूऔषध दुव्र्यसनमा फस्न थालेकोप्रति चिन्ता व्यक्त गर्दै सामाजिक रूपमा यसको नियन्त्रणका लागि ढिलो भइसकेको चेतावनी दिए। “विद्यालय शिक्षा सुधार गर्ने मुख्य जिम्मेवारी शिक्षकको काँधमा छ,” उनले भने, “लागूऔषधको दुव्र्यसन विद्यालयमै फैलिएको छ।”
सिंहले निजी विद्यालयमाथि पनि कटाक्ष गर्दै मधेशका निजी विद्यालयहरू विद्यार्थीको क्षमता विकासभन्दा प्रमाणपत्र वितरणमा सीमित रहेको आरोप लगाए।
उनले सामुदायिक र निजी दुवै विद्यालयको गुणस्तर सुधार गर्न स्थानीय तहका प्रमुख, उपप्रमुख तथा प्रशासकीय अधिकृतहरूको सक्रिय सहभागिता आवश्यक रहेकोमा जोड दिए।
नगरसभामा नगर प्रमुख प्रदीपकुमार खड्काले आर्थिक वर्ष २०८२/८३ का लागि ४५ करोड २७ लाख ७७ हजार रुपैयाँको बजेट प्रस्तुत गरेका छन्।
