काठमाडौं । ७.८ मेगावाट क्षमताको सुपरमाई हाईड्रोपावर लिमिटेडको सञ्चालक समितिको फागुन ११ गते बसेको बैठकले नयाँ नेतृत्व चयन गरेको छ। बैठकले संचालक बुद्धि बहादुर थापालाई कम्पनीको अध्यक्षमा चयन गरेको छ भने रिक्त रहेको सञ्चालक पदमा दिपेन्द्र महतोको नियुक्ति गरेको छ।
एस.एस विनायक इन्भेष्टमेन्ट प्रालिका प्रतिनिधि दिपेन्द्र महतो
सञ्चालक पदमा नियुक्त भएका दिपेन्द्र महतो १५+ वर्ष सूचना प्रविधि क्षेत्रमा अनुभवका साथै सामाजिक सुधारका क्षेत्रमा सक्रिय सामाजिक अभियन्ता रहेका महतो निजि विद्यालयका संचालक, ऊर्जा, पूर्वाधार तथा लगानी क्षेत्रमा अनुभव भएका व्यक्ति हुन्। उनी एस.एस विनायक इन्भेष्टमेन्ट प्रालिका प्रतिनिधिका रूपमा सुपरमाई हाईड्रोपावरको सञ्चालक पदमा नियुक्त भएका हुन्। महतो विभिन्न लगानी कम्पनीहरूमा आवद्ध रही जलविद्युत्, पूर्वाधार विकास तथा अन्य उद्योगहरूमा सक्रिय भूमिका खेल्दै आएका छन्। नेपालको ऊर्जा क्षेत्रमा दिगो विकास र पूर्वाधार निर्माणलाई प्रवर्द्धन गर्न उनको योगदान उल्लेखनीय छ।
सुपरमाई हाईड्रोपावरको भविष्य र योजनाहरू
सुपरमाई हाईड्रोपावर लिमिटेड इलाम जिल्लामा अवस्थित जलविद्युत् आयोजना हो, जसले ७.८ मेगावाट विद्युत् उत्पादन गर्दै आएको छ। कम्पनीले नेपालको ऊर्जा आपूर्तिमा महत्वपूर्ण योगदान पु¥याउँदै आएको छ।
नयाँ नेतृत्वले कम्पनीको प्राविधिक सुदृढीकरण, उत्पादन क्षमता विस्तार तथा दीर्घकालीन स्थायित्व सुनिश्चित गर्ने लक्ष्य राखेको छ। सुपरमाई हाईड्रोपावरले नयाँ लगानी आकर्षण, कम्पनीको वित्तीय मजबूती र व्यवसायिक विस्तारलाई अझ प्रभावकारी बनाउने विश्वास गरिएको छ।
नव नियुक्त नेतृत्वको भनाइ-
अध्यक्ष बुद्धि बहादुर थापाले सुपरमाई हाईड्रोपावरलाई थप प्रभावकारी र व्यावसायिक रूपमा सक्षम बनाउने प्रतिवद्धता व्यक्त गर्दै लगानीकर्ताको हितलाई सुरक्षित गर्दै अगाडि बढ्ने बताए। सञ्चालक दिपेन्द्र महतोले ऊर्जा उत्पादनको सक्षमता अभिवृद्धि गर्न प्रविधि सुधार, व्यवस्थापन सुदृढीकरण तथा नवीन रणनीतिक योजनाहरू लागू गर्ने आफ्नो उद्देश्य रहेको बताए।
नयाँ नेतृत्व चयनसँगै सुपरमाई हाईड्रोपावर लिमिटेडले उत्पादन वृद्धिका साथै जलविद्युत् क्षेत्रमा थप नवप्रवर्तनात्मक कार्यहरू गर्ने लक्ष्य राखेको छ।
