राजविराज । सप्तरीमा गुड्दै गरेको हायसको टायर एक्कासी पडकिएर दुर्घटना भएको छ । दुर्घटनामा एक जनाको मृत्यु भएको छ भने १३ जना घाइते भएका छन् ।
प्रहरीका अनुसार पूर्व पश्चिम राजमार्ग अन्तर्गत अग्निसाइर कृष्णासवरण गाउँपालिका ६ मा पश्चिमबाट पूर्वतर्फ जाँदै गरेको बा५ख २३१० नम्बरको हायसको पछाडिको टायर अचानक पड्किएपछि अनियन्त्रित भएर दुर्घटना भएको हो ।
उक्त दुर्घटनामा झापाको कन्काई नगरपालिका ८ बस्ने ५२ बर्षीय अमृका ओलीको मृत्यु भएको सप्तरी प्रहरीका प्रबक्ता एवं डीएसपी माधव प्रसाद काफ्लेले बताए । गम्भीर घाइते भएकी उनलाई अस्पताल पु¥याउनासाथ मृत्यु भएको उनले बताए ।
उक्त दुर्घटनामा हायस चालक झापाको बिर्तामोड नगरपालिका ४ बस्ने ४३ बर्षीय दुर्गाबहादुर मगरसहित १३ जना घाइते भएका छन् । उनीहरुको स्थानीय अस्पतालमा उपचार भइरहेको प्रहरीले जनाएको छ ।
