वीरगञ्ज । रौतहट जिल्लाको फतुवा विजयपुर नगरपालिका–५ सन्तपुर स्थित दलित (चमार) टोलमा दुई महिलासहित ६ जनामाथि सामूहिक आक्रमण भएको घटना सार्वजनिक भएको छ ।
पीडित पक्षका अनुसार फागुन १९ गते साँझ होली पर्वको पूर्व सन्ध्या तथा प्रतिनिधिसभा निर्वाचन हुनुभन्दा दुई दिनअघि उक्त घटना भएको हो । घटनामा परेर दलित समुदायका ६ जना घाइते भएका छन् ।
घाइते हुनेमा ५५ वर्षीय बिर्जा राम चमार, उनकी श्रीमती ५० वर्षीय गायत्री देवी राम, छोरा राजकुमार राम, सुब्बा रामकी १६ वर्षीय छोरी, ललन राम चमार र नरेश राम चमार रहेका छन् । कुटपिटबाट बिर्जा रामको ढाड र घाँटीमा चोट लागेको छ भने गायत्री देवीको शरीरभरि निलडाम देखिएको छ । त्यस्तै राजकुमार रामको टाउकोमा तीन टाँका लागेको छ भने १६ वर्षीय किशोरीको टाउको फुटेर सात टाँका लागेको पीडित पक्षले जनाएको छ ।
पीडित बिर्जा राम चमारका अनुसार सामान्य विवादपछि स्थानीय भुनेश्वर यादव, पसिन्द्र यादव, नितेश यादव, जगु यादव (नगेन्द्र यादव), सुखारी यादव, गिरधारी यादव, नबिन कुमार यादव र जयप्रकाश यादवसहितको समूहले लाठी–भाटा लिएर साँझ करिब ६ बजे घरमै प्रवेश गरी कुटपिट गरेका थिए । समूहले घरभित्र पसेर महिलासहित परिवारका सदस्यहरूलाई मरणासन्न हुने गरी कुटपिट गर्नुका साथै घरका सामान तोडफोड गरेको र दुई वटा मोबाइलसमेत फोडिदिएको पीडितको दाबी छ ।
पीडित परिवारका अनुसार घटनाको सुरुआत साँझ करिब ५ बजे सामान्य भनाभनबाट भएको थियो । त्यस क्रममा विपक्षी समूहले बिर्जा रामका छोरा राजकुमार रामलाई घरभन्दा केही पर कुटपिट गरेका थिए । प्रतिवादका क्रममा विपक्षी पक्षका एक जनाको टाउको सामान्य रूपमा फुटेको बताइएको छ । त्यसको करिब एक घण्टापछि विपक्षीहरू लाठी–भाटा लिएर घरमै प्रवेश गरी सामूहिक आक्रमण गरेको पीडितको भनाइ छ ।
घटनापछि इलाका प्रहरी कार्यालय सन्तपुरबाट पुगेको प्रहरी टोलीले आक्रमणकारीलाई पक्राउ गर्नुको सट्टा बिर्जा राम र उनका छोरालाई नै पक्राउ गरी हतकडी लगाएर लगेको पीडित पक्षले आरोप लगाएको छ । उनीहरूलाई थुनामा राखेर कुटपिटसमेत गर्दै इलाका प्रहरी कार्यालय विजयपुर पठाइएको दाबी गरिएको छ ।
स्थानीय समाजसेवी विजय यादवका अनुसार पीडितलाई पक्राउ गरिएको थाहा पाएपछि उनले प्रहरी निरीक्षक सुरेन्द्र यादवलाई फोन गरी छाड्न आग्रह गरेका थिए । पछि जिल्ला प्रहरी कार्यालय रौतहटका प्रमुख, प्रहरी उपरीक्षक (एसपी) सिताराम रिजाललाई जानकारी गराएपछि बिर्जा राम र उनका छोरालाई छाडिएको बताइएको छ ।
पीडितका अनुसार घटनाको एक सातासम्म पनि जाहेरी दर्ता गरिएको छैन । आइतबार र सोमबार इलाका प्रहरी कार्यालय विजयपुर पुगेर जाहेरी दर्ता गर्न आग्रह गर्दा पनि प्रहरी निरीक्षक यादवले वास्ता नगरेको र उल्टै थर्काएको आरोप लगाइएको छ ।
यता प्रहरी निरीक्षक सुरेन्द्र यादवले भने विपक्षी पक्षका एक जनाको टाउको फुटेको र निर्वाचनको संवेदनशीलता भएकाले उनीहरूलाई पक्राउ गरिएको बताएका छन् । पछि बिर्जा रामको परिवारका सदस्यहरू पनि घाइते भएको जानकारी पाएपछि सोही रात जिम्मा–जमानीमा बाबु–छोरालाई छाडिएको उनले बताएका छन् । निर्वाचनका कारण कारबाही प्रक्रियामा केही ढिलाइ भएको स्वीकार गर्दै घटनाबारे छानबिन गरी दोषीलाई कानुनी दायरामा ल्याउने प्रतिबद्धता व्यक्त गरेका छन् ।
जिल्ला प्रहरी कार्यालय रौतहटका एसपी सिताराम रिजालले घटनाबारे निष्पक्ष छानबिन गरी दोषीमाथि कारबाही गर्न निर्देशन दिएको बताएका छन् ।
यसैबिच स्थानीयवासीले इन्स्पेक्टर यादव इलाका प्रहरी कार्यालय विजयपुरको प्रमुख भएर आएपछि क्षेत्रमा अराजकता बढेको गुनासो गर्दै आएका छन् । केही समयअघि उनको मिलेमतोमा लाखौँ रुपैयाँको कौडा जुवा खेलाइएको आरोपसमेत लागेको स्थानीयको दाबी छ ।
