काठमाडौं। पाकिस्तानको कराँची सहरमा बुधबार राति भएका चार छुट्टाछुट्टै गोलीकाण्डमा कम्तीमा चार जनाको मृत्यु भएको छ भने पाँच जना घाइते भएका छन्। मेमन गोठ क्षेत्रमा दुई पुरुषको गोली प्रहारबाट मृत्यु भएको छ भने एक महिला घाइते भएकी छन्।
प्रहरीका अनुसार दुवै मृतकहरुको टाउकोमा गोली लागेको थियो। घाइते महिलालाई सुपर हाइवे नजिकैको एक निजी आवासीय क्षेत्रछेउको झाडीमा फेला पारिएको हो। प्रारम्भिक बयानमा ती महिलाले दुई अज्ञात व्यक्तिले गोली चलाएर फरार भएको बताएकी छन्। घटनास्थलबाट प्रहरीले ९ एमएम पिस्तोलका खोका र खाली मदिराका बोतल बरामद गरेको छ। घटनाको कारण भने अझै खुल्न सकेको छैन।
यसैबीच, लुटपाटको प्रयास विफल पार्ने क्रममा हुजैफा नामका एक युवकलाई पेटमा गोली लागेर गम्भीर घाइते भएका छन्। स्थानीयले भाग्दै गरेका लुटेराहरूलाई समातेर कुटपिट गरेपछि प्रहरीको जिम्मा लगाएका थिए। त्यस्तै, दिल्ली कोलोनी क्षेत्रमा भएको अर्को गोलीकाण्डमा तीन जना घाइते भएका छन्। चारै घटनाबारे प्रहरीले अनुसन्धान अघि बढाएको जनाएको छ। यसअघि फेब्रुअरी ११ मा स्वातको शाना करपा हाजी अबाद क्षेत्रमा बालबालिकाबीचको विवादले उग्र रूप लिएपछि भएको झडपमा एक जनाको मृत्यु तथा सात जना घाइते भएका थिए।
मृतकको पहिचान अधिवक्ता अत्ताउल्लाह जानका रूपमा भएको एआरवाई न्युजले जनाएको छ। घाइतेहरूको नजिकैको अस्पतालमा उपचार भइरहेको छ। घटनाबारे प्रहरीले अनुसन्धान सुरु गरेको छ र झडपसम्बन्धी सीसीटीभी फुटेजसमेत सार्वजनिक भएको छ। उता, लाहोर उच्च अदालतले बसन्त पर्वका क्रममा भएका मृत्यु तथा घाइतेका घटनाबारे दायर निवेदनमाथि सुनुवाइ गर्दै गृह सचिव पञ्जाब र सिसीपीओसँग प्रतिवेदन माग गरेको छ।
अधिवक्ता अजहर सिद्दिकले दायर गरेको निवेदनमा बसन्त पर्वका क्रममा ६ जनाको मृत्यु भएको र १०० भन्दा बढी नागरिक घाइते भएको दाबी गरिएको छ, जुन सरकारी दाबीभन्दा फरक रहेको उल्लेख गरिएको छ। (एएनआई)
