काठमाडौं – नेपाली कांग्रेसका महामन्त्री गगन कुमार थापाले हालै सार्वजनिक रूपमा यदि एमालेसँग प्रजातान्त्रिक अधिकार र कानुनको शासनमा कुनै सम्झौतामा पुग्नुपर्यो भने, कांग्रेस सरकार छोड्न तयार हुने बताएका छन् ।
सोमबार प्यूठानमा आयोजित कांग्रेसको सम्मेलनलाई सम्बोधन गर्दै गगन थापाले स्पष्ट रुपमा, कांग्रेसको मूल उद्देश्य प्रजातान्त्रिक अधिकार र विधिको शासनको रक्षा गर्नु भएको बताएका हुन् ।
उनले भने, “यदि कानुनको शासन र प्रजातान्त्रिक अधिकारसँग सम्झौता गर्नुपर्यो भने कांग्रेस सरकार छोड्न तयार छ। हामी यो अधिकारसँग सम्झौता गर्न सक्दैनौं, जसको लागि हाम्रो पार्टी जन्मिएको हो।”
गगन थापाले कांग्रेस र एमाले बीचको सम्बन्धका बारेमा थप प्रस्टिकरण दिए, जहाँ उनले कांग्रेसले एमालेसँग केन्द्रदेखि जिल्लासम्म बराबरीको व्यवहार चाहेको उल्लेख गरे। उनले चेतावनी दिंदै भने, “यदि हामीलाई हेप्ने प्रयास गरियो भने, कांग्रेस सरकारमा बस्ने छैन। हामी कुनै पनि प्रकारको दुर्व्यवहार सहेर सरकारमा बसेर रहन चाहन्नौं।”
थापाले एमालेसँगको सरकारमा रहने बारे २०८४ सालसम्म कांग्रेसको इमानदार प्रयास रहने पनि बताएका छन्। उनले भने, “हामी अहिलेको समझदारीलाई कार्यान्वयन गर्नेछौं र कुनै चकचक नगरी त्यसमा अडिग रहन्छौं।”
यस भाषणबाट गगन थापाले कांग्रेसको सिद्दान्त र यसको मजबूतीको कुरा गर्दै, पार्टीले कुनै पनि हालतमा कानुन र अधिकारको उल्लंघन सहन गर्ने छैन भन्ने सन्देश दिएका छन्।
