सिरहाको नवराजपुर गाउँपालिका-१ भगवतीपुरकी १७ वर्षीया किशोरी रिंकु कुमारी सदाको सामूहिक बलात्कार तथा रहस्यमयी मृत्यु प्रकरणमा प्रहरीले चारजनालाई पक्राउ गरेको छ।
छानबिन समितिका संयोजक एवं एसएसपी शान्तिराज कोइरालाले सोधपुछका लागि चार जनालाई नियन्त्रणमा लिइएको जानकारी दिएका छन्। उनका अनुसार पक्राउ पर्नेहरूमा पञ्चायती बस्नेदेखि प्रत्यक्षदर्शीसम्म रहेका छन्। उनले अनुसन्धानपछि अवस्था हेरी केहीलाई रिहा गर्न सकिने र कसैलाई मतियारका रूपमा मुद्दा चलाउन सकिने बताए।
‘अहिले सोधपुछका लागि चार जनालाई नियन्त्रणमा लिएका छौं। उनीहरूमाथि अनुसन्धान भइरहेको छ। अवस्था हेरेर कानुनी कारबाही अघि बढाइनेछ,’ एसएसपी कोइरालाले भने।
यसअघि, फागुन ८ गते कर्तव्य ज्यान, जबर्जस्ती करणी, शरीर बन्धक तथा लेनदेन मिलापत्र सम्बन्धी चारवटा मुद्दामा आठ जनाविरुद्ध पूरक जाहेरी दर्ता गरिएको थियो। जाहेरी इलाका प्रहरी कार्यालय, लहानमा दिइएको थियो।
गत माघ ३० गते आफ्नै घरमा झुन्डिएको अवस्थामा मृत फेला परेकी रिंकुमाथि त्यसअघि माघ २७ गते राति शौच गर्न बाहिर निस्किएको बेला सामूहिक बलात्कार भएको खुलेको छ। घटनालाई दबाउन २९ र ३० गते वडासदस्यसहित स्थानीयहरूकै संलग्नतामा गाउँमै पञ्चायत बसालेर मिलापत्र गर्ने प्रयास भएको थियो। उक्त पञ्चायतीमा पीडक पक्षबाट १ लाख ४० हजार रुपैयाँ जरिवाना भराउने र पीडित पक्षलाई प्रहरीमा उजुरी नदिन बाध्य पार्ने निर्णय गरिएको खुलासा भएको छ। प्रहरीले थप अनुसन्धान जारी राखेको जनाएको छ।
