धनुषा र सिराहा जिल्लाको सीमा भएर बग्ने कमला नदीमा आज कात्तिक शुक्ल पूर्णिमाको अवसरमा मेला लागेको छ । यसलाई कार्तिक पूर्णितमा र भूत मेला पनि भन्ने गरिन्छ ।
प्रत्येक वर्ष लाग्ने यस मेलामा एकाबिहानैदेखि श्रद्धालुहरूको घुइँचो लागेको छ । हिजो साँझदेखि धामी झाँक्रीसहित विभिन्न गाउँका मानिसहरू सारश्वर, चिकना, बनिनिया, बसपिट्टा, बरेरबा, फूलबरिया, उत्तरवाहिनी, इनर्वालगायतका घाटमा भेला भएका छन ।
धामी झाँक्रीहरूले आजको दिनलाई विशेष मान्छन्। उनीहरूका अनुसार कात्तिक शुक्ल पूर्णिमामा कमला नदीमा स्नान गरेपछि भूत–प्रेत र घरको कुल देवताको प्रभावबाट छुटकारा पाइन्छ । यो दिन भूत, बैताल, देवी–देवता पुज्ने र तिनबाट मुक्ति पाउने परम्परा सदियौँदेखि चल्दै आएको छ।
यस मेलालाई धामी झाँक्रीको मेला पनि भनिन्छ। नयाँ धामी झाँक्री बन्ने, तन्त्र–मन्त्रमा सिद्ध पाउने, र विभिन्न तान्त्रिक विधिहरूको अभ्यास गर्ने मान्यता यस मेलासँग जोडिएको छ।
स्नानपछि भक्तजनहरू कमला नदीको शुद्ध पानी घर लैजान्छन्। उक्त पानी जमिनमा छर्केर पूजा तथा घर शुद्ध गर्न प्रयोग गरिन्छ ।
मेलामा स्थानीय क्षेत्रका मात्रै नभई भारतबाट पनि श्रद्धालुहरू ट्याक्टर, बस, जीपजस्ता सवारीसाधनमा आएका छन्। कमला नदीमा स्नान गरेर दुःख, कलेश र पापबाट मुक्ति पाइने विश्वासले लाखौँको संख्यामा भक्तजनहरू भेला भएका छन्।
