काठमाडौं । आज (शुक्रबार) मन्त्रिपरिषद् बैठक बस्दै छ। बिहीबार नियमित बस्नुपर्ने बैठकलाई आज सारिएको हो। आज अपराह्न ४ बजे बस्ने मन्त्रिपरिषद्को बैठकले नेपाल प्रहरीको महानिरीक्षक नियुक्त गर्नेछ।
हालका प्रहरी महानिरीक्षक धीरजप्रताप सिंहसँगै उनका ब्याची एआईजीहरु सहकुल थापा, दिवेश लोहनी, उत्तमराज सुवेदी ३० वर्षे सेवा अवधिका कारण चैत १० गतेदेखि अनिवार्य अवकाशमा जान लागेकाले नयाँ नियुक्तिको तयारी गरिएको हो।
वसन्त कुँवर, टेकप्रसाद राई, दीपक थापा, श्यामलाल ज्ञवाली र किरण बज्राचार्य महानिरीक्षकको दाबेदार छन्। आईजीको प्रतिस्पर्धीमा रहेका एआईजीहरुले २ दिन अगाडि (बुधबार) मात्रै एआईजी पदको दर्ज्यानी चिह्न (फुली) लगाएका थिए। आईजीपी हुने प्रतिस्पर्धामा कुँवर र ज्ञवाली अगाडि छन्।
कुँवर मेरिट लिस्टको एक नम्बरमा छन्। मेरिटमा अगाडि भएको हुनाले उनलाई मुख्य दाबेदारको रूपमा हेरिएको छ। कुँवर २०५१ चैत ५ मा इन्स्पेक्टरबाट प्रहरीमा प्रवेश गरेका थिए। कुँवरसँगै प्रहरी सेवामा आएका ज्ञवाली मेरिट लिस्टको चौथो नम्बरमा छन्।
नेपाल प्रहरीको इतिहासमै पहिलो पटक महिला प्रहरी अधिकृत किरण बज्राचार्य आईजीको प्रतिस्पर्धामा छिन्। यसअघिसम्म नेपाल प्रहरीले आईजीको प्रतिस्पर्धी महिलासमेत पाएको थिएन।
