सिरहा । स्थानिय तह निर्वाचनको मौन अवधि सुरू भएपछि सिराहामा पैसा बाँडेको आरोपमा एक जनालाई स्थानीयहरुले नियन्त्रणमा लिएर प्रहरीलाई बुझाएका छन् ।
सिरहाको गोलबजार नगरपालिका वडा नम्वर २ का ६८ वर्षीय नेकपा माओवादी केन्द्रका कार्यकर्तालाई स्थानीयले नियन्त्रणमा लिएको सिरहा प्ररहीले जनाएको छ ।
पैसा बाँडिरहेको शंकामा नेकपा एमाले समर्थक व्यक्तिहरूले उनलाई नियन्त्रणमा लिएको र पछि प्रहरीले गएर रेस्क्यू गरेको जिल्ला प्रहरी कार्यालयका प्रहरी उपरीक्षक अर्जुन तिमिल्सिनाले जानकारी दिए ।
‘गोलबजारमा पैसा बाँडेको भन्ने शंकापछि उनलाई स्थानीयले नियन्त्रणमा लिएको रहेछ । पछि हाम्रो टोली गएर उनलाई केही गर्लान् भनेर रेस्क्यू गरेको हो,’ उनले भने, ‘पैसा बाँडेको भए आचारसंहिता उल्लंघन गरेको भन्दै निर्वाचन अधिकृतको कार्यालयमा उजुरी दिन भनेका छौं।’
उनको गोजीबाट ९ हजार रुपैयाँ बरामद भएको थियो । तर १० हजार रुपैयाँ बाँड्न लागेको भन्दै लिखित उजुरी परेको गोलबजार नगरपालिका निर्वाचन अधिकृतको कार्यालयका निर्वाचन अधिकृत शिवप्रसाद आचार्यले जानकारी दिए ।
उनलाई कार्यालयले स्पष्टीकरण सोध्ने तयारी गरेको छ ।
‘गोजीबाट ९ हजार बरामद भएको रहेछ। लिखित निवेदनमा १० हजार भनेर आएको छ । हामी स्पष्टीकरणको पत्र काट्दैछौं,’ उनले भने, ‘आचारसंहिताको उल्लंघन गरेको पुष्टि भएमा उनलाई कारबाही त गरिहाल्छौं। सुनुवाइको मौका दिन्छौं ।’
उता कपिलवस्तुबाट प्रहरीले १२ कार्टुन रक्सी समेत बरामद गरेको छ । मौन अवधिको समयमा रक्सी किनबेच गर्न निषेध गरिएको छ ।
