भक्तपुर। एमाले अध्यक्ष केपी ओलीले मधेश प्रदेश सरकारको नारा र व्यवहार फरक रहेको भन्दै कटाक्ष गरेका छन्। भक्तपुरको रोयल थाई इभेन्ट राधे राधेमा एमाले पर्सा–काठमाडौँ सम्पर्क मञ्चले मङ्गलवार आयोजना गरेको कार्यक्रमलाई सम्बोधन गर्दै ओलीले मधेश प्रदेश सरकारको नारामा ‘बेटी बढाउ, बेटी बचाउ’ रहे पनि व्यवहार साइकल पचाऊ रहेको आरोप लगाएका हुन्।
‘नारा लगाउँदा ‘बेटी बढाउ, बेटी बचाउ’ भन्ने। व्यवहारमा साइकल पचाऊ काम। तपाईँहरूको प्रदेश २ को आकर्षक नारा सुन्नुभयो होला,’ ओलीले भने। ‘बेटी बढाउ, बेटी बचाउ’ नारा लिएको मधेश प्रदेश सरकारले छात्रालाई साइकल बाँडेको थियो।
मधेश प्रदेश पर्यटकको हिसाब एकदमै राम्रो रहेको जानकारी दिँदै उनले सुनकोसी डाइभर्सन बनेपछि यस क्षेत्रको सिँचाइ सुविधा पुग्ने बताए। वीरगन्ज–काठमाडौँ रेल चल्ने बताएका उनले धार्मिक पर्यटनको हिसाबले मधेश प्रदेश उत्कृष्ट रहेको बताए।
