सर्लाही, साउन १६ गते । सर्लाहीमा एक १८ वर्षीय युवकको बीभत्स हत्या गरिएको छ ।
सोमबार सर्लाहीको हरिपूर्वामा एक युवकको बीभत्स ढङ्गले हत्या गरिएको अवस्थामा शव फेला परेको छ ।
सोमबार बिहान गाउँकै आधारभूत विद्यालयको चर्पी निर्माणका लागि खनिएको खाल्डोभित्र हरिपूर्वा नगरपालिका–३, धनकौलका १८ वर्षका सुशीलकुमार यादवको शव फेला परेको प्रहरीले जनाएको छ ।
धारिलो हतियारले घाँटी रेटिएको र छिनोले आँखामा प्रहार गरेर हत्या गरिएको अवस्थामा सुशीलको शव फेला परेको सर्लाही प्रहरीका प्रवक्ता प्रहरी नायब उपरीक्षक विजय यादवले जानकारी दिए ।
भारतमा मजदुरी गर्ने सुशील केही दिनअघि घर फर्केका थिए । गएको सुक्रबारदेखि नै उनी घरबाट बेपत्ता भए पनि परिवारले प्रहरीमा भने खबर गरेका थिएनन् ।
परिवारका सदस्यले सुशील पुनः कामका लागि भारत नै गएको हुनसक्ने भनी बेपत्ता भएको खबर नगरेको प्रहरीलाई जनाएको छ ।
शवलाई पोस्टमार्टमका लागि प्रादेशिक अस्पताल मलङ्गवा लगिएको र यस सम्बन्धमा थप अनुसन्धान भइरहेको जिल्ला प्रहरी कार्यालय सर्लाहीले जनाएको छ ।
