काठमाडौं । पूर्वराज्यमन्त्री रामचन्द्र रायको हत्याको अनुसन्धानका लागि केन्द्रीय अनुसन्धान ब्यूरो (सीआईबी)को टोली सर्लाही पुगेको छ ।
प्रतिनिधिसभा बैठकमा बोल्दै गृहमन्त्री रमेश लेखकले अनुसन्धानका लागि सीआईबीको टोली सर्लाही पुगेको बताएका हुन् ।
गृहमन्त्री लेखकले भने,‘घटनाको थप अनुसन्धानका लागि मधेस प्रदेश प्रहरी कार्यालयबाट समेत प्रहरी टोली खटिएको छ। सीआईबीबाट सिनियर अफिसरको नेतृत्वमा प्राविधिक जनशक्तिसहितको टोली काठमाडौंबाट घटनास्थलतर्फ परिचालन भइसकेको छ।’
सीआईबीबाट प्रहरी निरीक्षकको कमाण्डमा दुई जनाको प्राविधिक टोली अनुसन्धानमा सघाउनका लागि खटाइएको छ।
आइतबार राति चन्द्रनगर गाउँपालिका-१ स्थित रतनपुरमा रहेको फर्म हाउसमा पूर्वराज्यमन्त्री रायको हत्या भएको थियो ।
उनीमाथि उखु काट्ने धारिलो हतियार प्रयोग भएको प्रहरीले जनाएको छ। उक्त हतियार घटनास्थलबाट ५० मिटरको दुरीमा रहेको झाडीमा फेला परेको थियो ।
प्रहरीले हाल उनकै घरमा रहेका सहयोगीलाई नियन्त्रणमा लिएको छ। सहयोगी कविलासी नगरपालिका-३ स्थित मदनपुरका २१ वर्षीय रामउजैन राय यादव छन्।
